Ouzphenn 500 den a oa deuet da bPleiber-Krist d’an 30 a viz Meurzh da arc’hantaouiñ koust ar prosezioù a oa bet da heul an devezhioù manif hag harz-labour a oa bet warlene da zifenn ar gwir da vont war e leve da 60 vloaz. E Bro Montroulez e oa bet stank mat an niver a dud bet o kemer perzh er stourm e doare pe zoare. Bloaz goude , daoust da wask ar justis hag ar polis an dud oberiant er stourm sokial zo deuet a-benn da zerc’hel gant liammoù padus da dalañ ouzh an direizhded.
Sed aze an destenn bet lennet war al leurenn gant an aozerien , e galleg hag e brezhoneg.
An holl stourmerezed ha stourmerien war al leurenn fenoz a fell dezho trugarekaat ac’hanoc’h a-greiz kalon da vezañ deuet niverus fenoz. Ur c’hengred ret ha frealzus eo, pa weler pegen kriz e c’hell bezañ ar waskadur ha pouez divent ha distrujour ar frankizouriezh.
Bloaz zo, e bro Montroulez, evel pep lec’h e Breizh, ez eus bet ul luskad stourm sokial kreñv-mat kaset gant al labourerien, ar retredidi hag ar yaouankiz evit talañ ouzh reform ar retredoù. Un nebeut ac’hanomp o deus bevet gwaskadur ar polis hag ar justis.Kondaonet omp bet da daolioù kastiz uhel-mat peogwir hon eus kredet embann hor c’hounar, hon disemglevioù gant politikerezh gouarnamant Macron pa ‘deus Borne didruez graet he seizh gwellañ evit kas ar reform da benn, sikouret gant Darmanin, flik kentañ bro C’hall.
Diskuilhañ a reomp seurt gwaskadur a vev al luskadoù sokial, ar sindikalourien hag al labourerien pa vez eus ur reform nac’het gant 90 % ac’hanomp ! Diskuilhañ a reomp eo digempouez penn-da-benn respont ar gouarnamant a dag ac’hanomp kriz pa chom direspont e-tal al labourerien-douar ober pezh a garont, pe vije stankañ ha distrujañ. Hag e vije ur c’hounar maez-lezenn hag unan all lezennel ? Trawalc’h ! Poent eo e vije rentet justis, e teufe en-dro ar justis sokial hag e echufe e poubellennoù an Istor seurt renad politikel frankizour koulz ha sekuritourien an RN .
Pa weler e vez distrujet tamm-ha-tamm ar servij publik, gwallgaset al luskadoù sokial, ar gwir d’ober harz-labour hag e kresk feulsterioù ar polis, aze e mil a-bouez stourm ha degas da soñj an holl eo ar c’hengred ur ger hag un ober liammet penn-kil-ha-troad gant hor valeurioù sindikadel, politikel pe kevredigezhel. En em zifenn e-tal ur Stad poliser hag ur justis a renkad sokial zo koustus, tre. Setu perak e rankomp trugarekaat ur wech ouzhpenn an holl re amañ fenoz evit skoazellañ ac’hanomp, ha sammañ ganeomp hon difenn a-stroll gant hon breutaer Erwan Lemoigne.
Ne vije ket bet posubl an nozvezh gengred-se hep ar 14 strollad, kanerezed pe kanerien deuet fenoz digoust, trugarekaat a reomp ivez evel-just an holl dud a-youl vad, ar broduerien lec’hel hag an holl reoù all a fell dezho, eveldomp-ni, sevel ur gevredigezh reisoc’h, dieuboc’h, doujus ouzh an endro, enep-faskour, doujus ouzh ar gwirioù sokial, ar gumuniezh LGBT, an divroidi hag ar re dibaper !
Hep kengred, frankiz ebet !