FLASH INFO
Bretagne Info
Tag

Skos

Browsing
Brezhoneg / Articles en Breton

Kresk ar c’hoant dizalc’hiezh e Kembre hag emvod etre maodierned teir broad kelt

By

Gouez d’ur sontadeg bet aozet gant Yes Cymru e c’hellfe 32 % eus voterien ar vro mouezhiañ evit an dizalc’hiezh. Tost da un den diwar tri neuze.

http://


Pa seller a-dost ouzh ar rummadoù oad eo splannoc’h c’hoazh ar c’hresk :
Evit ar voterien etre 18 vloaz ha 24 bloaz, 59 % anezho a lavarfe ya d’an dizalc’hiezh ma vefe dalc’het ur referendom.
Etre 25 ha 34 bloaz an dregantad zo par da 54 % ha 57 % evit ar re etre 35 ha 44 bloaz.
Ar rummadoù koshañ zo stagoc’h ouzh peurrest ar Rouantelezh-Unanet.
1023 den a oa bet aterset evit ar sontadeg e miz Eost. Dañvez preder evit dazont koulzadoù Yes Cymru neuze, ur vanifestadeg a vo dalc’het e Aberystwyth d’ar 26 a viz Gwengolo da c’houlenn ma vo dalc’het ur referendom diwar-benn an dizalc’hiezh e Kembre.

http://

D’al Lun 14 a viz Gwengolo e Caerdydd  maodierned Kembre, Skos ha Norzh-Iwerzhon a sino ur c’hendiskleriadur evit ma vo asantet reiñ an aotre da zerc’hel referendomoù e pep broad.

E anv Plaid Cymru e vo Rhun ap Iorwerth, evit SNP e vo John Swinney  ha besprezidantez Sinn Féin Michelle O’Neill ac’h emgavo asambles da c’houlenn doujañs d’ar gwir d’en em dermeniñ en teir broad kelt meneget. En Iwerzhon e vefe ar goulenn kentoc’h diwar-benn unaniezh an enezenn, evel ma oa bet skrivet du war wenn e Emglev ar Gwener Mat e 1998. Evit poent e ra Andy Burnham, maodiern Breizh-Veur, skouarn vouzar da c’houlennoù ar pobloù a c’hellfe kimiadiñ diouzh galloud Londrez.

Keep Reading
By
Brezhoneg / Articles en Breton

Skos : peseurt doareoù stourm da vroudañ ar referendom ?

By

Prim eo bet an aozadur anvet «All Under One Banner–An holl dindan ur banniel» oc’h adkavout ar boaz da vont er straedoù evit goulenn ar gwir da vouezhiañ diwar-benn dizalc’hiezh Skos.

Ne fell ket da c’houarnamant Londrez e vefe aozet ur referendom nevez, daoust m’en deus gouarnamant lec’hel Skos embannet fraezh e oa e soñj d’en ober. Emañ broadelourien SNP (Strollad Broadel Skos) o ren ar vro.

D’ar Sadorn 5 a viz Gwengolo e oa deuet miliadoù a dud da zibuniñ e straedoù Dùn Èideann–Edinburgh, da respont da c’halv AUOB. Pell emañ ar sifroù meneget er c’helaouennoù–etre 3 000 ha 5 000 hervez an traoù–diouzh an engroeziad a oa bet bodet gant ar memes framm e 2019 e Glaschu–Glasgow : 35 000 den hervez ar polis ha 90 000 hervez an aozerien.

N’eo ket dister koulskoude, pa soñjer emeur e penn-kentañ ur c’helc’hiad politikel nevez, digoret gant raklezenn gouarnamant Skos evit aozañ ur referendom all.

Ret eo kemer e kont ivez ez eus lod eus an dizalc’hourien a gav gwelloc’h en em vodañ en ur framm all anvet «Believe in Scotland–Krediñ e Bro-Skos». Tost eo ar framm-se ouzh ar Re C’hlas hag an SNP, hag ouzh pennoù bras zo eus an embregerezhioù meur, evel ar c’hlub embregerien Business for Scotland.

Ur framm all, Radical Independence Campaign, lusket gant an tu-kleiz radikal, a chom bev ivez, met hep follenn-hent ebet evit ar mare.

Kreñvoc’h eo ar vroadelourien er boestoù-votiñ hiziv an deiz eget ma oant e 2012, met gwanoc’h e seblantont bezañ er straedoù. Sed aze an dislavar politikel a ranko an dizalc’hourien dont a-benn da zirouestlañ ma fell dezho lakaat da dalvezout, ur wech ouzhpenn, gwir pobl Skos d’en em dermeniñ.

 

Keep Reading
By
Actualité / Keloù

Skos : war-du ur referendom nevez

By

Embannet en deus Gouarnamant Bro-Skos ur raktres-lezenn nevez diwar-benn an dizalc’hiezh evit ma vo dalc’het ur referendom , daoust ma oa bet lavaret gant Kentañ Ministr ar Rouantelezh Unanet Andy Burnham (Labour Party)  e nac’hfe e vefe dalc’het unan.

E-doug ur bellgomzadenn gant Maodiern Skos, John Swinney (SNP-Broadelour), e miz Gouere e vije bet adlavaret e savboent gant ar C’hentañ Ministr nevez. C’hoarvezet e oa ar gaozeadenn-se goude ma oa bet dilennet gant ar voterien, e dilennadegoù miz Mae, ur muianiver a izili eus Parlamant Bro-Skos a-du gant an dizalc’hiezh.

129 kannad zo e parlamant Skos. 58 anezho zo perzh eus SNP – Strollad Broadel Skos ha 15 perzh eus ar Re C’hlas. E Skos e sav an Ekologourien a-du gant an dizalc’hiezh abaoe pell amzer. Setu m’emañ muiañ niver e Dael Skos akord gant dizalc’hiezh ar vro.

17 kador az a gant Strollad al Labour, 12 gant ar virourien, 10 gant ar Frankizourien-Demokrat (Lib-Dem), 17 gant Reform UK (tu-dehoù pellañ) . An holl re se zo kontrol o soñjoù d’an dizalc’hiezh.

Pa oa o komz en Iwerzhon an Hanternoz, en deus Burnham lavaret ivez ne vije ket kenebeut « war an daol » ur boblvouezhiadeg diwar-benn adunvanidigezh Iwerzhon. Hervezañ o deus diskouezet ar referendomoù diwar-benn Bro-Skos hag ar Brexit e vez ezhomm eus kalz amzer evit pareañ diouzh « ar gloazioù degaset gant seurt degouezhioù ».

 

John Swinney Maodiern Skos ha broadelour

Met Gouarnamant an SNP, distroet e penn ar vro, en doa roet da c’houzout e kinnigfe ur raktres-lezenn nevez diwar-benn ar referendom a-raok fin e gant devezhiad kentañ er galloud.

Embannet eo bet ar raktres-lezenn bremañ. Miret eo bet ennañ ar memes goulenn hag an hini bet savet ouzh ar voterien e 2014 :

« Hag ur vro dizalc’h e rank Bro-Skos bezañ ? Ya pe nann. »

Aprouet e oa bet ar goulenn-se gant ar Bodad-dilenn, Embannet eo bet ar raktres-lezenn a-raok Program ar Gouarnamant.

Disklêriet en deus John Swinney e oa « splann hag anat » ar goulenn bet dibabet.

Lavaret en deus :

« Muioc’h am bo da lavarout diwar-benn dazont bonreizhel Bro-Skos er sizhunvezhioù a zeu. Den ne vo gouest da gemer divizoù gwelloc’h evit dazont Bro-Skos eget an dud a zo o chom amañ. Dazont pobl Bro-Skos eo — ha da zen all ebet. »

Ouzhpenn termeniñ ar goulenn, e resisa ar raktres-lezenn piv en do ar gwir da vouezhiañ. N’eus bet lakaet deiziad ebet c’hoazh evit ur referendom nevez avat.

Lavaret en deus ar gouarnamant e vo « lakaet un deiziad er raktres pa vo kinniget ent-ofisiel ».

Disklêriet en deus Swinney :

« Cheñchet eo bet ar bed da vat abaoe 2014. Cheñchet eo bet ar Rouantelezh-Unanet ivez, ha Bro-Skos kement-all.

E-pad ma c’houzañv an dud er Rouantelezh-Unanet ur galloud-prenañ o chom a-sav hag an distrujoù ekonomikel degaset gant ar Brexit, ez eus broioù en-dro deomp o kenderc’hel gant ur c’halite buhez gwelloc’h hag o kaout muioc’h a binvidigezh da lakaat en o servijoù publik — daoust n’o deus ket, alies, na zoken ul lodenn vihan eus ar mammennoù fonnus hag eus ar perzhioù ekonomikel kreñv a zo gant Bro-Skos.

E miz Mae en deus ar brasañ niver a izili eus Parlamant Bro-Skos a-du gant an dizalc’hiezh bet dilennet biskoazh votet evit ma vo treuzkaset d’ar Parlamant skosat ar galloudoù ret da aozañ ur referendom diwar-benn dizalc’hiezh Bro-Skos.

Ret eo bremañ da C’houarnamant ar Rouantelezh-Unanet doujañ da vouezh pobl ha Parlamant Bro-Skos ha treuzkas dezho ar galloudoù ret.

Prest eo Bro-Skos. Prest eo pobl Bro-Skos. Poent eo da C’houarnamant ar Rouantelezh-Unanet ober e lod. »

E miz Gouere en doa unan bennak a fell dezhañ chom dianav e-barzh ar gouarnamant lavaret d’ar Press Association e oa bet reut Burnham e keñver Swinney en e enebiezh ouzh ur votadeg nevez :

« Pa oa bet kaoz eus an dizalc’hiezh en doa ar C’hentañ Ministr lavaret sklaer-tre e rankjent asantiñ ne oant ket a-du an eil gant egile. N’eo ket un dañvez a zo e kreiz e brederiadennoù ha n’eo ket ur gaozeadenn en deus c’hoant da genderc’hel ganti. »

N’eo ket echu eta ar c’heñver-nerzh etre Londrez hag Edinburgh. Moarvat e vo un heklev trouzus e straedoù ar vro a-raok pell ma chom sonn ha dibleg an Ao. Burnham , bac’het m’emañ gant e emzalc’h pennek.

Keep Reading
By
Brezhoneg / Articles en Breton

Harperien Celtic Glasgow skoaz ouzh skoaz gant Palestina.

By

Kantadoù a vannieloù eus Palestina a oa bet douget uhel d’an 18 a viz Eost e Glaschù gant harperien Celtic Glasgow da vare ar c’hrogad mell-droad enep da skipailh Hapoer Beer Sheva hag a zo kampion Israel. Trec’h eo bet ar skosiz gant 5 pal hag unan hepken evit an Israeliz. Diwar galv “Celtic fans for Palestine” e oa bet aozet an dasparzh bannieloù er sportva, ar pezh en deus rediet an UEFA da embann e oa aet ar supporterien en tu all da lezennoù ar reolennoù diabarzh a vir ouzh an dud da gas « kemmenadennoù ideologel, politikel, a denn eus ar relijion, kunujennus pe feukus » e doare pe zoare da vare krogadoù an UEFA. D’an 22 a viz Gwengolo e vo gouvezet petra e vo ar c’hastiz evit Celtic Glasgow.

celtic

Hep gortoz an deiziad se paotred ha merc’hed ar c’hlub bet krouet gant Iwerzhoniz harluet da Skos o doa graet ur galv evit paieañ an taol-kastiz gortozet. Klevet mat-tre eo bet ar galv, kar kement a arc’hant zo bet gounezet e vo gouest harperien Glasgow da gas arc’hant ouzhpenn d’un ospital e Palestina, d’ur greizenn evit bugale Palestina repuet e broioù all pe c’hoazh d’ur greizenn sevenadurel Palestinad. En tu all da 100 000 euro zo bet rastellet evit poent.

 Ur c’hrogad « distro » a vo dalc’het d’al lun 29 a viz Eost e Israel ar wezh-mañ. Polis ar vro en deus roet da c’houzout e vije berzhet ober kement all en o sportva. 250 Skosad zo gortozet enno.

Supporterien Celtic Glaschù a vez kustum da embann o mennozhioù politikel e mod pe vod er sportvaoù, evit Palestina, a-enep d’ar ouennelouriezh pe evit Iwerzhon unvan war a seblant n’emaint en soñj chom a sav.

223091_1997032892596_4075236_n

Keep Reading
By