D’ar 27 a viz Mae un 50 den bennak deus Gwengamp ha Sant-Brieg a oa en em vodet dirak savadur Ajañs Rannvro ar yec’hed e kêr Sant-Brieg. O fal a o a lakaat war wel youl fall ar ministrerezh e-karg deus ar yec’hed a nac’h embann dre skrid en ur mod ofisiel pegoulz e vo addigoret servij gwilioudiñ ospital Gwengamp.
Dañset e oa bet graet dirak an ARS, pignet gant doenn, dipasket gitonioù, krazet silzig , livet ar mogerioù , peget skritelloù …Bep sizhun abaoe ar 24 a viz Mae o deus dalc’het difennourien an ospital publik gant un oberenn stourm bennak. Ur vanifestadeg veur a vo dalc’het d’ar sadorn 17 a viz Even e kêr Gwengamp.
Ma ne gred lavaret ar gouarnamant ne addigoro ket an ti-gwilioudiñ ne seblant ket gouest da dutañ tud da zont da labourat da wengamp…
Bez e c’heller ivez displegadennoù enrollet gant radio Breizh pa oa bet roet ar gaoz da c’hGael Roblin dilennet en ti-kêr.
Sed aze an destenn bet distaget e brezhoneg gant Maiwenn Salomon evit displegañ abegoù fulor tud Gwengamp :
Hiziv an deiz n’haller ket gwilioudiñ e ospital Gwengamp abalamour d’un astal .
Goulenn groñs a reomp ur skrid frank ha splann a-berzh ministrerezh ar yec’hed a rofe deomp un deiziad da adkregiñ gant ar servij gwilioudiñ evit mont war-du ur mont endro stabilh.
Ur mad boutin d’an holl eo an ospital publik.
Takad Gwengamp hag an annezidi o deus ar gwir da gaout un ospital dre wir leun gant ur servij gwilioudiñ, ur servij o plediñ gant gourezhommoù , ur servij surjianerezh boutin.
Ar gwir d’ar yec’hed evit maouezed ha gwazed zo ur gwir a ranker doujañ diontañ e bro Gwengamp evel e lec’h all.
Evit ar gwir da c’henel, da vezañ heuliet gant servij publik ar yec’hed e takad Gwengamp emaomp amañ hiziv evit astalañ en ur mod arouezus Ajañs Rannvro ar Yec’hed hag e dibaboù nul ha noazus.
Difennomp an ospital publik e pep lec’h e Breizh ! Deuit holl da wengamp d’ar 17 a viz Even da 10e30 !